تطورات وتغيرات

تطورات وتغيرات التكنولوجيا في هذا الزمان اصبحت لا تعد ولا تحصي بل ان بعضها قد يحدث في ثواني معدودة لدرجة ان الواحد مبقاش ملاحق على الجديد في اي حاجة .. الاجانب شغالين زي النار في كل حتة ومش مديين فرصة لحد ياخد نفسه ولما مبيلاقوش حاجة جديدة يدوخونا بيها يروحوا ناطيين على اي شركة جديدة يشتروها ويشيلوا الاسم ويحطوا اسمهم مكانها وتطلع جديدة نوفي بورقة المصنع .. طبعا دي احدى سياسات الاحتكار التكنولوجي الجديدة واللي بتدي الكيانات الكبيرة او الناس اللي معاها فلوس السيطرة على اي فكرة متطلعش من مطبخهم .. الموضوع دا زي ما ليه اضرار كتيرة ليه برضة مميزات ممكن اتكلم فيها في بوست تاني على رواقه لان الغرض من البوست دا هو استعراض بعض التغييرات اللي حصلت واولها التدوين.

التدوين في ايامنا دلوقتي اختلف بشكل كبير جدا عن التدوين وقت عمل البلوج دا او قبلها بكام سنة من خلال تجارب فطاحل التدوين في مصر والعالم العربي اللي اغلبهم ياما كان بيتحبس او بيعتبروه خاين وعميل لأنه بيقول الحقيقة بالإضافة الي قلة عددهم اللي يتعد على الصوابع ودا لان اغلب الناس كانت مهتمة بحاجات تانية اهم من التدوين وهي مساندة مصر في مشوار البطولة الافريقية واللي الحمد لله ربنا كرمنا واخدناه تلت مرات ورا بعض.

التطور التكنولوجي ادي التدوين فرصة التسلل بشكل تلقائي وغير طبيعي  من خلال بعض مواقع التواصل الاجتماعي الحديثة زي التويتر واللي يعتبر احد اهم اشكال التدوين في صورة مصغرة فبدل من كتابة موضوع من مئات الكلمات تقعد تدور فيهم على افكار وصور بلاغية ..  تقدر دلوقتي انك تكتب اللي عاوزة في رسالة تتكون من 140 حرف توصل في نفس الوقت لمئات او الاف من متابعينك لحظة بلحظة فاصبح التدوين اسهل وعملي اكتر بالإضافة الي انه بقى حي ومحاكي للأحداث والمواقف الحياتية المختلفة بشكل مبسط وكمان بليغ لأنك من خلال 140 حرف مطلوب من المدون او التويب بلغة التويتر انك تقول المضمون المعبر عن مئات الكلمات  .. الحاجة اللي بتخليك في قمة الابداع اللغوي.

احد اشكال التدوين الغير مباشر عن طريق مواقع التواصل الاجتماعي هو موقع (الفيس بوك) وترجمته بالعربية هي (كتاب الوش) فبعد سنوات من التفاعل مع موقع الهاي فيف (hi5) واستخداماته المتعددة من تظبيط الولاد للبنات والعكس ظهر لينا اختراع جديد اسمه الفيس بوك افضل واريح في الاستخدام .. يمكن فاعليته او مشاركته في عالم التدوين اقل كتير عن التويتر الا انه اصبح ساحة تواصل واستيعاب لشرائح اكبر من فئات المجتمع وكذلك في التأثير فمن خلال الفيس بوك ممكن حشد الاف البني ادمين في ثواني والموضوع دا اثبت عمليا من خلال ثورة 25 يناير (بالمناسبة احنا في مصر عملنا ثورة وخلعنا مبارك وتونس سبقتنا وخلعت بن علي وليبيا حصلتنا وخزوقت القذافي وكل دا من النت والفيس بوك حد كان يصدق (ايموشن خبيث)).

اضافة الي الفيس بوك والتوتير في عالم التدوين ظهر برضة خدمات كتير زي (Tumblr) وهو نفس فكرة التويتر بس بعدد حروف اكبر .. ومواقع وخدمات كتيرة يظل التويتر والفيس بوك افضلهم واكثرهم انتشارا ولكن يبقى البلوجر والورد بريس هم الاباء الشرعيين للتدوين الالكتروني في العالم كله.

واحنا مع عودة السلطنة للعمل واستقبال الرعايا مرة اخرى كان لازم نجاري التطور التكنولوجي الكبير فقررنا نكمل في البلوجر بشكل رسمي ولكن غير منتظم الي حدا ما بس موجود بشكل اكثر انتظاما بمراحل على التويتر ودا هتلاقوه على جنب الصفحة دي وكمان الفيس بوك وجوجل بلس واللي مش هيلاقي حاجة فيهم يقدر يتابع موقع السلطان الرسمي اللي موجود في البروفيل الخاص بالبلوجر برضة في الجنب .. اما بقى لو مش حاجة من دول ولا حتى البروفيل يبقى ريحوا نفسكم واخلعوا من هنا قبل ما يصدر امر الاعتقال عليكم (ايموشن غضبان) استعرضنا معكم بعض التغييرات على الساحة بايجاز شديد وقمنا بتوضيح طرق التواصل مع السلطنة .. ننتظر انضمامكم لنا والى اللقاء في بوست اخر ومرسوم سلطاني جديد.

راجع من تاني .. سلطان زماني

اربع سنين الا كام شهر .. هي مدة غيابي عن السلطنه والتدوين والكتابة بشكل علني من خلال مدونتي الصغيرة (سلطان زماني).

اربع سنين الا كام شهر اتغيرت فيها حاجات كتير .. تقريبا التاريخ كله اتغير في غمضة عين ومش بس التاريخ هو اللي اتغير لاء دا كل حاجة فينا اتغيرت ومنها البلوجر ودنيا المدونات اللي كانت بتهز العالم زمان .. دلوقتي بقت اغلبها قصور مهجوره اصحابها بيزوروها زي ما بيزوروا امواتهم في المقابر الا من رحم ربي منهم.

المشكلة مبقتش مشكلة مدونيين اكتر منها مشكلة قراء فللاسف القراءة في حياتنا عموما اصبحت شبه معدومة اكتر مهي كانت متنيلة بستين نيله الا ان مازال هناك نقطة امل في الرجوع بشكل تدريجي بخطوات تقيله ممله .. بس هترجع زي ما حاجات كتير رجعت قبل كدا.

رغم دا كله قررت اني ارجع اكتب بشكل علني وصريح لست متخفي في اسم مستعار او شخصية خيالية ليس من باب الخوف او الاستحياء عشان محدش يفهم غلط الا انها اقرب الي تجربة مختلفة تتعاش .. بجانب بعض الظروف اللي كتبت عليا ان تبقى كل كلمة محسوبة وممكن يتضرر منها ناس تانية فكان لابد من خوض هذه التجربة خصوصا مع وجود بعض المتعة في انك تبقى كاتب وراسم شخصية ملهاش وجود ومع ذلك الناس تحبها وتتفاعل معاها لكتابتها مش لشخصيتها اللي هي اساسا من وحي خيالك .. فمع اختفاء كل هذه الظروف او قتلي ليها بحثا عن الحرية ولانها بصريح العبارة متستاهلش .. قررت ارجع وبالمناسبة الشخصية الخيالية هتفضل موجودة ومش هقول عليها دلوقتي, يمكن بعدين او يمكن هي تظهر لوحدها(ايموشن خبيث).

من ضمن اسباب رجوعي للكتابة هي اني محتاج اكتب واوثق بعض المواقف اللي تستحق التوثيق في زمن اختلط فيه الحق بالباطل .. يمكن كلامي في يوم يبقى سبب لكشف حق او باطل ويمكن ميبقاش الا ان اللي يهمني هو اني ابقى قولت رأي ورزقي على الله.

زمان كان عندي صعوبة شوية في المواظبة على الكتابة لاني مش موظف .. انا مجرد واحد بيكتب اللي في دماغه واللي على مزاجه الا ان دي مبقتش دلوقتي المشكلة لان في الاكبر والانيل منها وهو الكتابة بشكل تهكمي او ساخر زي ما كنت بعمل بس ححاول .. الاهم من كدا واللي مش هسيبة ابدا هو اني مش هتخلئ عن تفاؤلي لانه ديما كان سلاحي ومصباحي في اصعب المواقف واكتر الطرق ضلمة ,تفاؤلي ديما مسبب ونابع من ايماني وعشمي في الله يعني مش متفائل كدا وخلاص .. هكتب واتفائل يمكن في يوم كتاباتي تفيد حد او تفاؤلي يكون سبب في دفعه لحد بيقرأه .. ويمكن كلامي في يوم يبقى سبب في دخولي السجن لا قدر الله ولو اني اشك اصل السجن اليومين دول بقى للوزراء والمسئولين عشان يريحوا اعصابهم من الشعب بس مين عارف .. ممكن ميحصلش لا دا ولا دا ومحدش يقرأ كلامي من اساسه وبكدا ابقى ريحت واستريحت (ايموشن خبيث).

التدوينة دي افتتاحية لزوم التنبية على اعادة افتتاح السلطنة من جديد .. هروح لفاصل عقبال ما ننضف ونروق ونرجع تاني في تدوينة جديدة في وقت مش بعيد عشان نعرض اخر المستجدات في العالم دلوقتي ونحاول نرسم خارطة طريق السلطنه في الفترة اللي جاية.

رمضان جانا

بعد غياب دام 11 شهر وصل رمضان اجمل وافضل الشهور بالنسبة ليا واعتقد بالنسبة لناس كتير اوي

من اكتر الشهور اللي بترتبط معانا بذكرايات صعب تتنسي ودايما بنفتكرها

مش عايز ارغي كتير بس هقول كل سنة وكلكم بخير وياريت كلنا نحاول نستغل الشهر دا اكبر استغلال ممكن

لان في الاخر احنا الكسبانين ومكسب فوق الخيال


غايب بقالي فترة وعارف ان في كتير زعلانين مني لعدم السؤال (ايموشن واحد مكسوف)

بس للاسف كالعادة الغياب مش بمزاجي واتمنى من كل واحد قصرت في حقة انه ميزعلش مني دا حتى رمضان كريم

كل سنة وانتم طيبين تاني مرة ويارب يعوده علينا بالخير على المسلمين جميعا وعلى كل شعوب الارض

ماتش مصر والكونغو .. هو الجمهور جاي يشجع ولا يشتم .. الجزء التاني

نكمل الجزء التاني من الجزء الاولاني للموضوع اللي فات

بعد الرغي الكتير في تفاصيل المباراة ندخل في سبب كتابة الموضوع من اساسه وسبب الهجوم الغير مبرروبالشكل الهمجي اللي شفناه من بعض المسؤلين بالاتحاد وبالمنتخب وكان ضد جمهور النادي الاهلي بصفة عامة ولو ان الموضوع مصدرش منهم لوحدهم زي ما قلت في البوست اللي فات

وحتى لو قلنا هو جمهور الاهلي اللي كان ورا دا وسبب في كل اللي حصل طب مش دا برضة حقة

يعني مثلا واحد اتربى في الاهلى ونجح فيه واشتهر على حسه وفي الاخر باعه في وقت هو اشد الحاجة ليه ولخدماته لاء وكمان حطه في موقف بايخ لا يليق بيه ولا بتاريخه الكبير

هيجي واحد ويقول هو اخد من النادي كتير طب مهو ادى للنادي اكتر .. طب هل هو ادى للنادي اكتر من اللي اخده

اعتقد ان العكس هو الصحيح وحتى لو قلنا كل واحد كان بياخد حقة ومفيش حد زايد على حد في العمليه دي

يبقى في الحالة دي يجي حاجة اسمها الاصول وشيل الجميل مش احطة قدام الامر الواقع

ازاي اصحى الصبح الاقي لعيب ساب البلد ومشي وهو لسه في بداية الموسم وبعد قفل الانتقالات يعني مفيش فرصة لنادية انه يضم حد تاني

واحد هيجي ويقول حقة اصل الاهلى ظلمة ومسمحلوش او خبى عنه العرض دا .. لنفرض ان الاهلى منعه من الاحتراف ليه مستخدمش المادة اللي استخدمة عند هروبة في الوقت المناسب وقدام وسائل الاعلام على الاقل كان بين ان الاهلي هو اللي غلطان وساعتها كان طلع منها ولو اني معتقدش لان كل الدلالات بتقول عكس كدا وبتقول ان الاهلى مسمحلوش لان النادي اللي راحة دون المستوى ولا يليق باسم الحضري والاهلي وفي الحالة دي نقدر نقول ان الاهلى على حق وحتى لو كان خبى العرض برضة على حق عشان هو اساسا عرض لا يذكر

وبعيد عن دا كله لنفرض ان الاهلي هو اللي غلط او بعض مسؤلية تعاملوا بشكل وحش وسيء في حق الحضري طب وهو النادي ملهوش حق عنده يخلية يرضله الجميل في ابسط اشكاله وهو انه يخطر الفريق او يقاضية في الفترة اللي تسمحله انه يجيب بديل عشان الفريق ميقعش او يضر.

للاسف الحضري غبي وضيع نفسة افتكر انه لما يسيب الاهلي بالشكل دا هيرد اعتباره برفض النادي للعرض المقدم ليه او انه بيجازي مسؤلي الاهلي لكن في شكل الفريق والنادي ككل

او دا كله ان الفلوس عامته ومخلتوش شايف وعارف هو بيعمل اية وحسب ما يذاع ان الحضري مواليد كفر البطيخ فهمه على قدة

لكن مهما نقول او نعيد وحتى لو جية الحضري بشهادة معامله اطفال عمر ما الجمهور ما هيغفرلة خاصة بعد التمثيلية الاخيرة اللي عملها وكان المصريين او الاهلوية شوية عيال هتصدق

وعلى رأي المثل اللي بيشيل قربة مخرومة بتظروط عليه .. ونتقابل كمان تلت اربع سنين والحضري بيعتزل وبيعمل ماتش اعتزاله في كفر البطيخ وبعدها بيروح على بيتهم يقضي فيه ما تبقى له من العمر

ورجوعنا للماتش واحداثة هنقول الجمهور مهما كان جنسيتة معاه حق مليون المية خاصة ان دا تقريبا اول تصادم بين الجمهور والجزمة قصدي الخاين وبرضة رد على موالسة وسيناريوهات تعصب النجم حسن شحاتة اللي بقى فاكر ان هو اللي بيجيب البطولات مش اللعبية

عموما ياريت منعلقش اخطاءنا على حد مهما كان مين وياريت كل واحد يتعلم من خطاءة ويحاول يصلحة ومنبقاش زي المثل اللي بيقول مقدرش على الحمار اتشطر على البردعة

والى اللقاء في مونديال 2010 كمشاهدين او كضيوف شرف في اول ماتش وياريت بس نوصل للامله دي وسلملي على شحتوتتي

ماتش مصر والكونغو .. هو الجمهور جاي يشجع ولا يشتم

امبارح كان ماتش مصر والكونغو في تصفيات كاس العالم

هنبدا الموضوع من اول الاستاد لكل اللي شافه سواء في التليفزيون او حضر بنفسه مكنش هيصدق ان دا ماتش لمصر وفي تصفيات كاس العالم اكتر من نص الاستاد كان من الجيش اللي حضر كمدد وكجمهور اجباري لتشجيع المنتخب عشان ميلاقيش الاستاد فاضي فيجيلة احباط ..

الجمهور اللي حضر درجة اولى وتانية سكوت وهدوء تام يخليك تحس انك قاعد في سينما مش استاد وماتش وزعيق وزيطة اما التالتة صاحبة دوشة كبيرة حصلت ويمكن سبب موضوعي دا ..

الدرجة التالتة مكنتش مجرد تكتل او تجمع بشري بالتصنيف الكروي العام انهم الجمهور اللي جاي يشجع منتخب مصر بدون اي انتماءات داخلية او تفضيل بين اللاعبين وفرقهم بل كان مقسم طبعا الاغلبية جمهور الاهلي وكان واضح جدا من اعلام الاهلي واللون الاحمر دا غير ان زي ما قلت اغلبية يبقى من غير اي نقاش هو الاهلي ودا هو التصنيف الوحيد للفريق ولن يكون هناك اي علامات اخرى للتمييز ..

اما باقي الدرجة التالتة فكانت اكبر اقلية واكثر الاقليات هي للزمالك ودا واضح برضه من خلال الاعلام والتي شيرتات وايضا الفراخ البيضة تحت علامة كنتاكي المميزة للزمالك ..

يتبقى بعد كدا كام واحد يتعدوا على الصوابع ممكن تقسهم زي مانت عاوز وزي ما اي حد يحب .. اسمعلاوي .. انباوي .. سكك محلاوي ..

ندخل في الاحداث وعشان نكون على نور من اولها انا مش هحلل الماتش انا بتكلم على الجمهور اللي عايز يتفرج على التحليل او الماتش يفتح مودرن سبورت هيلاقي اونكل مدحت شلبي قاعد كل يوم بيرغي في نفس الاحداث بكرافتته الخضراء بتاعت اتصالات دي ..

نرجع تاني ونقول بداية عادية جدا لاي ماتش يعدي عشر دقايق يبدا الجمهور في حالة ملل يظهر متسلل في الدرجة التانية وينادي على الحضري بصوت يبدوا انه تشجيع فبمجرد ان نظر له الحضري في نظرة خاطفة وشاور بايدة للمشجع دا حتى كان الرد من المنادي اسرع من نظرة الحضري الخاطفة .. قاله ك. أ.. وبايدة بعث باشارة اشادة باللغة مفيش تعليق عليها غير (تيييييييييت) ..

عدت دي وقالت الحمدلله انها جات على واحد خلينا بقى نركز في الماتش وياريت محدش تاني يطلع ويعمل دا ويشتت الحضري (طبعا كان الشر كله بيلعب في دماغي وكنت بتمنى الجمهور كله يعمل كدا (ايموشن ابليس))

لسه مكملتش امنيتي الشريرة حتى تحركت الجبهة الاهلوية في الدرجة التالتة وبأدب هتفت (يا قليل الاصل جايين نشجع مصر) واستمرت كتير بصراحة دي عجبتني لانه هتاف رغم انه عدائي لكن غير مهين ويستحقة الحضري بجدارة

عشر دقايق واتهمد جمهور الاهلي ونزل شيكابالا للتسخين وهو وراء مرمي الحضري قامت جماهير الفراخ البيضاء .. قصدي الزمالك وهتفت (شي شي شيكابالا ن.. (تيت) الحضري وتعالا) ولم يستمر الموضوع دا لاكثر من عشر دقايق مع اختلاف الهتافات بين المهين وغيره حتى انتهى الشوط الاول ..

ورجعنا للشوط التاني ومشي عادي بالعكس كان افضل للجماهير كله مع بعضة ينادي باسم مصر خاصة المجموعة اللي هتفت ضد الحضري وكانها جايه عشان بس توصله رسالة انك ولا تفرق عندنا زي ما جيت هيجي غيرك واحنا اصحاب الفضل والنهاردة احنا مش جايين عشانك ولا حتى عشان نشتمك لاء احنا جايين لمصر .. وسمعني موسيقى رأفت الهجان وهو بيفتح باب الشقة ليسرا في تتر النهاية

هكتفي البوست دا بس بسرد احداث الجماهير كما عايشتها لحظة بلحظة ودا لان التصريحات والكلام اللي طلع كان اكبر من اللازم وكانهم بيدوروا على شماعه يعلقوا عليها الاداء الضعيف للفريق وغرور المعلم حسن شحاتة ..

والله وصرت بلوجر

اخير وبعد جدال وتفكير كبير مع نفسي اخد اكتر من سنة من وقت انشائي للاكونت دا في فبراير 2007

قررت اني اعمل بلوج وانضم الي صفوف البلوجرريين بعد ما سبقني اغلب اصدقائي الاوغاد في تسلسل اقرب الي عدوه لكنها عدوه جميلة

من احد الاسباب اللي خلتني اعمل المدونة دي هو اشتيقائي للكتابة او بمعنى اصح حرية الكتابة

فهنا انا هكتب اللي انا عاوزه واللي على مزاجي بدون اي قيود ولا خضوع لمتطلبات صحفية او حساب لقارئ جريدة معينه

ولا هكون محايد او مجامل لفلان او علان وبقولها من اولها اللي هيزعل ميدخلش هنا (ايموشن ديكتاتور)

ومش محتاج اقول ان دي مدونة شخصية خاصة بيا عاملها عشان ارغي واقول كل اللي في نفسي حاجة كدا زي ما بيقال بجعر بصوت عالي ومسير الايام تتداول ونتكلم ونعرف بعض اكتر

وقبل ما انسى ولو انها كانت المفروض تبقى اول حاجة تتقال .. يا مراحب بكم في السلطنة ونتمنى لكم قضاء اسعد الاوقات وكل عام وانتم بخير وحظ سعيد المرة القادمة وكل الكلام اللي بيتقال في المناسبات دي